زنگان-کانون وبلاگ نویسان جوان زنجان

وبلاگ"گعده های دوستانه "نوشت
ایلده اون گون انقلاب ایلرحسین عاشقلری

کوی عشقه  فتح باب ایلرحسین عاشقلری

مدعی دنیا سنون اولسون نوا بسدیربیزه

سیزگیون الوان لباسی بوقرا بسدیربیزه

زاهدا سن گیت بهشته کربلا بسدیربیزه

روضه نی جنت حساب ایلرحسین عاشقلری

بوتون اینسانلار بو دنیادا بعضی صفتلری چوخ سیویللر و گوگوللری ایسترکی اولاری کسب ایله سین لر. حتی اولار کی دینی زندگی ایلمیوب بیله تربیت تاپمیوبلار. اولاردان نچه سی عبارتدی صداقت، امانت، عدالت، شجاعت، شهامت و ایگیدلیک (جوانمردی) و فتوتدن.

اما بولارین آراسیندا هامیسیندان گوزل و سیومه لی ایله «فتوت و ایگیدلیک» دی کی دینون کولگه سینده ئوزونه چوخلی یر آچوب و هامی شجاعتلی وشهامتلی اینسانلاری ئوزونه جذب ایلیوب.

 فتوت و جوانمردی ملکونده، حضرت اباعبدلله تکجه پرچمدار و میدانداریدی. ایله کی حضرت قمر بنی هاشم امام حسینه ارادتمند و حتی نوکر اولماقی ئوزونه افتخار بیلور، بو او حالدادیر کی دنیا او حضرتی ایثار و وفاداریلن تانور. اودورکی ایگیدلرین هامیسی حضرت اباعبدلله الحسین علیه السلامی ئوزلرینه الگو بیلوللر هرچندکی شاید بعضیلری ئوزلریده باشدا اولمویالار (یعنی ملتفت دگیللر آما سوروشاندا کی مثلا بو ایشی ندن اوتور گوروسن، سوزلری نین سونوندا جوابلاری بورا یتیشورکی چون امام حسین علیه السلام بینن ایشدیر)

آما بوکی نیه حضرت بیله بیر نقش تاپوب گرک امامین یاشایشین و قیامین اوخویوب و جوابی اوردا تاپاخ، بو یازقی بیله بیر مقامدا دگیل، انشاءالله ئوز یرینده.

هر ایل محرم آیی یاخین اولدوقجا عاشقلرین ئورگی اسر، قلبلری سینه ده چیرپینار و تلسللرکی بیر عزا مجلسی تاپالار، اوردا حاضر اولوب دویونجا آغلیالار، سینه ویرالار، و حضرت زهرایه عرض ادب ایلیب و بهتر بوکی بیر ایلی چون قوه ذخیره ایلیلر (بیر قدرتی کی شیطانیلان مبارزه ایده لر و داها بونداندا یاخشی بو کی؛ جهاد اکبره نیرو آلالار، ایله او جهادی کی سیدالشهدا ئوزی او یولدا شهید اولوب)

گینه ایام عزا گلدی شرر دللره دوشدی               هیجان ایللره دوشدی

سوء تبلیغ ایلینلر گنه مشکل لره دوشدی            گمیسی سللره دوشدی

مدعی بسدی بو سودا سنه آخرضرر ایلر

اون بیرآی ییرمی گونون زحمتین اون گون هدر ایلر

اصلا بیر عامل کی شیعه نین یاشاماسی و مؤثر اولماقینا چوخ باعثدی عاشورادی کی شیعه لر امام حسین علیه السلامدن تبعیت ایلیوب شهادتی ئوزلرینه افتخار بیللر، نمونه سی امام خمینی(ره) نهضتیدی کی حسینچی جوانلار جاندان کیچدیلر تا اسلام و مملکت و ناموس قالسون.

شاه مظلومین محرمده قراسین سویماریخ

بیرقدم کوی محبتدن کناره قویماریخ

فعل تبلیغات سوئه تا حسین وار اویماریخ 

دویسا مجنون لیلیسیندن بیز حسیندن دویماریخ

گردیسه پا دررکاب ایلر حسین عاشقلری

بیز بو پرچمدن برات آللوخ ایشیتسون مدعی

گیتمریخ آیری مسیره گیتسه گیتسون مدعی

طعنه لر بسدی خطا یولدان قیتسون مدعی

کیفر کفاره باخسون عبرت ایتسون مدعی

کاخ نامردان یاتار یاتماز حسینون پرچمی

امام ایستدی ئوز پاک و مطهر اجدادی؛ ابراهیم، اسماعیل و حضرت خاتم الانبیاء محمد مصطفی صلوات الله علیهم اجمعینین یوللارین آخرا یتیروب و کامل ایلیه، اویودی کی حضرت ئوز حجین یاریدا قویوب حرکت ایلدی عراقه طرف.

سسلندی کربلا ای کعبة الحرام 

گوندر حسینیمی من یاخشی ساخلارام

خلیل الله گوزل زحمت چکدی، یانار اودا دوشدی حج انجام ویردی، قربانلیخ کسدی، اما عمللرینین باشا چاتماغی و قبول اولماغی امام حسیندن دیر،  چون کی امامین محبتی حضرت ابراهیمه کمک اولدی؛

اولدی ابراهیمه نازل اود یانندا جبرئیل 

هرسوزون اولسا دیدی خدمتگذارم یاخلیل

یوخ دیدی کیم پنج تن حقین تانیر اولماز ذلیل

منجنیق اوستونده سسلندی حسین جان الدخیل

دوندی اود گلزاره صدمه جانی اوددان گورمیوب

حضرت اسماعیل سیچیلمیشدی کی قربان اولسون اما الله ایستمدی اسماعیل ذبح اولا، پس حضرت طاری (جل و علا) نین طرفیندن بیر قوچ گلدی جانین نجات ویردی. حضرت ابراهیم اوغلونی دیری آما باشی اوجالیقیلان قربانگاهدن منزله گتیردی. بونون سری بویودی کی ذبیح الله ذبح اولماسین، چون ذبح عظیم اسماعیل دگیلدی بلکه امام حسینیدی؛

بیله بیر سوزدی بویورموش حضرت خیرالانام

جانیمیز بیردی حسین مندندی منده اوندانام

گلمسیدی فدیه اسمائیلیدن قالمازدی نام

او دیری قالدی حسین گلسین وجوده والسلام

آفرینش چرخی بیله ماه تابان گورمیوب

هاجر خیمه ده نگران جوان بالاسینا گوزلوردی آلله تعالی ده بالاسین تئز یتیردی تا آناسینون گوزلری یولدا قالماسین اما کربلا خلیلی سود امر قربانینی گتیردی میدانه، آناسی ایستیردی کی علی اصغر سو ایچه و گولومسنوب آناسینا ساری گله، علی اصغر امامین قوجاقندا ادب نشان ویردی آغلامادی تا امام اوتانماسون اما خانم رباب علی اصغری گوره بیلمدی؛

الهی گیتدی اصغریم شفق قارالدی گلمدی

قالوب ئورکده اللریم شفق قارالدی گلمدی

چوخ ننه لرینده الان گوزلری یوللاردا قالوب، امام حسین عشقیله و امام خمینی دعوتیله عباس، علی اکبر، علی اصغر و قاسملری یولا سالدیلار میدانه طرف، اما بالالاری ایتگین گیتدیلر. آلله! حضرت ربابون علی اصغره آغلاماقی حالا گوره، تزلیکجه اوللارا بیرخوش خبر ویر.

و سون جمله بوکی؛ اگر خانم زینب اولماسیدی، کیم حضرت سیدالشهدانین نهضتین عالملره یتیریب، امامین قانین هدفه یتیره بیلردی؟

بیر یانا عشق حسین، انبوه موکب بیریانا

یدی دریا بیر یانا عطشان یانان لب بیریانا

نسل آدم بیر یانا یتمیش مقرب بیر یانا

یتمیش عاشق بیر یانا تک غملی زینب بیر یانا

بیلدی یورقون جان یاتار یاتماز حسینون پرچمی...